En dé, ormai luntàan, gh'è circulàat

'na  gran nutisia che l'è  'ndata foort;

( me sò mia chi) ma i gh'à decretàat :

" Anca Cremuna la g'arà el so pòort! "

Gh'è cuminciàat, cusé, le riuniòon,

parlamentàar, pulitic, sindacàat

e nomine ( ma Dio, che cunfusiòon )

de cumitàat e sotocumitàat!

" Ghe fumm pasà apèena betuline

o fumm el transatlantico del Po?"

..... " e se se pesca peu le ambuline?

.....no, dopo 'l  bagn pudarum fàal amò?"

Gh'è rivàat  zò minister, deputàat,.....

parìia, el sindegh, el gh'es vincìit al lott....

ma quand, dopo, el naster i g'à tajàat

i se n'è acòort che ghe mancava vergòt!

Cat.... ma gh'è gnanca 'n batél chì in de Pò ?

Per segnà 'l  pòort ghe vòol mia i fari?

Ma  sée: el Minister  el vegnarà zò amò

quand sarà pròont, almèen, la Stradivari!

Quand gh'è rivàat la nave.... che festòon!

( cusé ed Minister  l'è rivàat amò).....

e l'è rivàat, per l'inaugurasiòon,

altre sées volte.... ma 'l  pòort el và gnamò!

Pèensa e ripèensa e j g'à numinàat,

forse per daghe en tono d'impurtàansa,

adèss, anca del Pò el Magistràat....

( forse per fà ai pèss-gatt la survegliàansa!).

Sperùm adess, per faghe en pò de unùur

e perchè teutt el vàga en pò a butéer,

chi fàsa, del Murbasc, el sò Pretùur

e, del Navìli, al sò Canceliéèr!

Intàant  i cremunées i spera e i spéta

che végna anca l'ura de sté pòort.....

..... Ma insòma, rìiva gnanca na barchéta..?

Màh....Prima d'éser  vìiv..... l'è bèle mòort!