La femminista
Mé, preparàa 'l mangiàa a mé marìit,
méteghe in s'el taol la culasiòon.....
faghe seu 'l lét.....ma insoma chi l'à dit
che lu, che l'òll, insòma, l'è el padròon?
Cat, fidegh, sèent itée : la te par gieusta
ch'el vobbia cumandàa perchè le braghe
el gh'i à seu lu ? Ma me ciàpi na freusta....
el fò giràa... el mandi a lumaghe!
Ma adess, sé: finalmèent i gh'à inventàat,
per liberàne da la situasiòon,
so mia se l'è en gruppo o 'n cumitàat
in dua se parla de liberasiòon!
Ghe sunti 'ndata, e là mé g'ò truàat
en sac de dòne e jeun che bacajàava.....
a sentel el parìiva n'avucàat
e chélé, alée.... le màan le ghe ciuc-ava!
E pò, i m' - dat en bac cun en cartél
cun seu, i m'à dit, en slogan d'ucasiòon,
e cun sta prucesiòon, cusé bel bel.....
i m'à purtàat dal centro al Batajòon.
Gh'um fatt na cantadina, gh'um vusàat,
pò, pian pianèt, sun turnàde indrée......
ma me pensavi che gh'ji mia cumpràat
gnèent da mangiàa.... e me fìa mal i pée!
A cà, gh'ò truàat teutt bel preparàat,
la pasta calda, la pitàansa seu.....
Dio, che vergògna che g'ò mai pruàat!.....
No, no, t'el giuri:..... i me béca peu!