Vàardi na préeda de la mé citàa

che la resist al tèemp...la gh'à na stòoria,

e me dumàandi quanti ànn la gh'àa....

ma chì se và luntàan cun la memoria!

 

Ah, se de Cremùna la pudèss parlàa

la pianéarèss, me dìsi, d'emusiòon:

pasà in raségna i ànn.... pudì cuntàa

d'i persunàgg, de guère, de invasiòon....

 

La storia de Zanéen, di sò artisti,

de Stradivàari, di sò gràan pitùur,

de Monteverdi, di alter musicisti,

de tanta gèent che gh'à fàtt unùur!

 

Ma, àan se la ricordum, l'è finìida

la storia antìiga e te sèet ritruàada

adèss, mudèerna, bèla e ingrandìida:

vécia Cremùna.... te n'èet fàtt de stràada!

 

Te manca nièent: te gh'èet anca 'l Pòo

per fà le féerie sèensa tanta spéesa,

dìme, Cremùna... ma sa vòot amò?

..... Te gh'èet perfina in " B" la Cremunese!

 

Ma, chél  che pusée cheunta, la tò gèent

che, forse, l'è del mòond la pusè bùna,

chél pòpol che, in d'él còor, semper el sèent

l'amòor per la sò tèra... per Cremùna!