Te ghèet de veder, Cèca, che rubàse

se in gir te voltet  l'occ en pò a vardàa,

cuma le se vestìss done e regàse.....

che rìder ! Le pàar mate da ligàa !

Camìise sfilucèente, braghe stréte

che marca anca chél che se vèd mìa,

e in peu sfrangiàade, stinte, mia tàant néte....

ma cùma fàale a 'ndà cusé, perdìa!

Vedeset cùsa le se mètt ai pée...

vìnt ghèi de tàc..... sò mìa cuma le fà

per teutt el dé andàa avanti e indrée

tacàade vìa cusé, sèensa cascàa !

Le camiséte, avèerte  fina chì,

( te fò mia 'l sègn se no te scandalìset ),

culàane, culanìne, sò mia dìi.......

Pàar d'éser a S.Péeder.... té sa diset?

Te ghèet de véder sa le gàa a le màan.....

anéi, anelòon, fedi e fedìne....

mé dighi ch'ì à cumpràade  d'an magnàan,

roba che te fà rider le galìne !

Ma anca se ridùmm en pò de chéle

che và a la moda màta de adèss......

sèem bèle, de Cremuna, j è le putéle!....

Vestìide bèen o màal, le piàas listèss !