Le elesioon
Ma sé: 'ndomm amò a vutàa......
o 'l cumeun, o 'l parlamèent,
o 'na lége de abrugàa
o 'n qual alter acidèent!
E intàant rìiva zò chée
che cumincia a bacajàa
per ciapàa, cusé, i usèi
che, per lùur, g'à de vutàa.
"Farùm chésto.... farùm chél!"
i prumett a la sò gèent.....
ma l'è teutt en baduéll.....
gh'è tant feumm e pò peu gnèent!
N'é la dìis anca la storia:
quand i voti i gh'à ciapàat....
se ghe scurta la memoria
e i gh'à teutt desmentegàat!
Che la sia la volta buna!....
( e chì i prega Gesù Crist ),
Ma s'i rìiva a la pultruna....
chi s'è vist....s'è vist..... s'è vist!
E chél pover eletùur,
cu n le urécie amò che sùna.....
anca lu 'l prega el Signùur
perchè el ghe la mandi bùna!
Teuti i prega a sò manera,
ma se 'l cunt, pò, l'è mia bòon,
fa negòtt: in primavera,
l'ann che vèen..... altre elesiòon!
