Musicomania
Và a studiàa piano, viuléen,
la trumbéta o 'l viulòon..!
Te sèet peu tàant picenéen,
crédet te d'eser mìia bòon?
Cùma té, gh'è tanti giòoen
che s'è mìss en pòo a studiàa
e j fà " Elisa" de Beethoven...
i la fàa anca a balàa!
Va a speciàate en pòo cun chèi
che te sùna la " gavòta"!
I te fà drisàa i cavéi....
dài... và.... sùna àan té vergòta!
E cusé, el và Giuanéen,
teuti i dé, avanti e indrée,
(sòta al bràas el sò viuléen)
a studiàa per la tournée.
Ma 'n bèl dé 'l và a cà piansèent
e 'l ghe dìis a sò papà:
" Gh'è le sincopi..... i acidèent....
ròbe breute da studiàa!
Con l'archèt a smanegà
me g'ò 'l bràas che sta peu seu,
e a fòorsa de schisàa
me g'ò i dìit ch'en pòodi peu.
Parlum mìia, pò, de chél
che vèen fòora dal strumèent...
j è mia note... en baduéll
che te strìpa anca i dèènt!
I veséen che gh'è de fiàanc
l'alter dè j g'à vusàat:
" Itée... rìiva i saltinbàanc?
Ma gnamò l'èet rasegàat?"
E per fà storia finìida
cun el pover Giuvanéen,
mèt el pée in seu la vìida....
però, sòta.... gh'è el viuléen!